The Old living way in the Levant
Posted on: June 2, 2018
The Old living way in the Levant
كنت تفوت على الدار
تلاقي حمار مربوطة بعامود الكهربا الخشب ع مدخل الدار …
وبوابة عتيقة خشبها مشقق
وقفلها مصدي …وبتفتحها
بتزيزأ وبينكسر الصمت…
بتدخل عالدار وبتعبق ريحة
الحطب الوالع بالموقدة للطبخ ..
وبتفح ريحة صابون البرش العربي
من اللكن الطافح بالغسيل
والمي دارجة مع رغوة
الصابون …جنب البركة …
من حد حملة حطب
السنديان والغار بتاخد معها
الوراق اليابسة …
وعايمينك على المسطبة بالارض شوية
بامية يابسة وشوية ملوخية بلاطة
لحمة بجنب البركة
مغسولة …
ومنجل معلق بمسمار بالحيط …وشاكوش …
وفاروعة …وأدوم …
وكيس جنفيص مخيط
بالمسلة داخلو مقص عريش وسكين سان ويت لتطعيم الزيتون ..
وبنطلون عري منشور
ع سلم خشب قديم متكي
ع حيط مورق بالطين …
وميزان بصحنين قش …
ومد لكيل القمح والزيتون
والسميد…
وبالزاوية عدة لشك الدخان
ميبر ومسلة وخيطان …
واوضة البقرات ع مدخلها
فدان الفلاحة ..السكة ..
والنير وجلال الحمار ..
واوضة القعدة فيها
حصيرة ومساند وطراحة …
ومعلق عالحيطان صورة الكعبة .وسيف ذو الفقار.. والإمام علي والأسد رابض عند قدميه …
وبتدخل لجوا بتلاقي
اللحف والفرش والشراشف
فوق بعضها مغطايين بشرشف ابيض …
وخزانة خشب قديمة
نملية ….بتعبق منها ريحة
الزمن …
وببور كاز ساحر
وروائح الزعتر اليابس واليانسون والزوفا والسميد والسماق بتفوت ع مناخيرك منعشة ..
وارض الدار مروبة
ناعمة وبتندهلك يلا عالغدا …
كبة بطاطا .. وصحن كمونة وبطاطا مقلية عالحطب
سلطة …فرفحين …ومقتا وبندورة بعلية مع زيت زيتون ..
كاسة لبن …وجاط بليلة ..
وعدة خبز مرقوق …
وبعد الغدا بتطلع بطلع لتحت التينة
عادرج معمر من حجارة المقلع وبتشرب كباية شاي وبتتلئح عالحصيرة بخيمة الغوردل والهوا بيلعب لعب …
ومرات بتنام تحت خيمة العريش وبتغفل وما بيعود فيك تفتح عيونك..
آخ يا زمن آخ …
يا ريت بيرجع
الزمن الماضي …
وما بدنا لا مصاري ولا تقدم ولا مدنية …
ونرجع نلعب بالدار
ومانحلم
نكون اد الكبار…
يا ريت ..
تحية حب 
💕 لكل من عاش ذالك الزمن الماضي ..
Adonis Diaries 
Leave a Reply