Adonis Diaries

فادي عبدالأحد Fadi Abed A7ad posted on Fb his childhood reminiscence at school· 

بالصف السابع .. قرر استاذ الديانه يعمل مسرحية عن غزوة بدر ..

وكرمال يشد همتنا خبرنا بأنه ممكن يحضر المسرحية مدير التربية ورئيس البلدية ووجهاء المنطقة والاهالي …

وقال لازم نتدرب منيح ونعمل اكتر من بروفه.. وشرحلنا شو لازم نشتغل …

قال رح نختار منكم مجموعة صغيرة من الطلاب حتى يقوموا بدور المؤمنين وأضعاف مضاعفة رح يمثلوا دور الكفار ..

السيناريو رح يكون على الشكل التالي :

بالبداية بيهجم المشركين عالمؤمنين وبيحاصروهم بزاوية المسرح وبيقوم المؤمنين بالاستبسال بالدفاع لحتى يصرخ واحد منهم بصوت عالي (الله اكبر) ..

ولما يسمع المؤمنين هالصرخة بيستجمعوا قواهم وبيهجموا هجمة رجل واحد عالمشركين اللي بيهربوا لما يشوفوهم وبينحشروا بزاوية المسرح وهيك بينتصرالمؤمنين …

بدأ الاستاذ باختيار الممثلين وهون وقع بخطأ قاتل ..

اختار الشاطرين وانا واحد منهم لأداء دور المؤمنين بينما اختار المشركين من الكسالى والزعران والرسبانين …

يبدو ان زملائنا المشركين تحسسوا من الموضوع شوي وأخدوا على خاطرهم ..

وأضاف الاستاذ بالبروفة الأولى مافيه سيوف خشبية ..فقط عراك بالأيدي وخلولنا شغلة السيوف للمرات القادمة ..

المهم اخد كل من المؤمنين والمشركين موقعه على المسرح بانتظار إشارة البدء من الإستاذ ..

بدأت المعركة وهجموا هالكفار هجمة رجل واحد وبلشوا فينا ترفيس وتلبيط وصارت الكفوف والضربات تنزل علينا متل زخ المطر .

.وانا من سوء حظي طلع غريمي ابو جهل اللي عم يمثل دوره معتز الطحش هاد معتز وزنه مية كيلو ورسبان سنتين بالسابع وبلش فيني كف ياخدني وكف يجيبني لحتى صرت اصرخ واستنجد بحياة ابوك عمي ابو جهل ..

الله يخليلك ابنك جهل ومرتك ام جهل حاجتي ..وهاد مو تمثيل هاد اسمه أكل هوا ….

قالي اختك انت وأبو جهل ليش نسيانك وقت اللي طعميتني قتلة من استاذ العلوم وما كنت تنقلني بالمذاكرة …هلق اجا وقت الحساب ….

واستمرت المعركة …. والمشركين نازلين فينا نحن الذين آمنوا رفس وتلبيط وصرنا نصرخلوا لحمودي اللي كلفو الاستاذ يصرخ الله اكبر …ولك حمودي قول الله اكبر بقا وريحنا ….بس المسكين كان قاعد عم يبكي على نضاراتو اللي كسرلو اياهن ابو سفيان ..

لا واستاذ الديانة ما كان منتبه قاعد عم يطق حنك مع آنسة الموسيقى …

هون انا انتخيت وقررت ارتجل من عندي وغيّر السيناريو وبلشت اصرخ الله أكبر …. ولك الله أكبر …

ولما سمعوني المشركين عم اصرخ وبدل ما يهدوا بالعكس تحمسوا زيادة وكأنهم كفار فعلا”ويا ويلي عاللي عملوه ..

انو حدا فيهم يهرب او ينسحب معاذالله .. بالعكس مع كل الله اكبر يزدادوا شراسة وبطش ..

قولوا الحمد لله راحت آنسة الموسيقى وفضيلنا استاذ الديانة ..

وطلب من المشركين ينهزموا ويرجعوا لورا بس بعد شو بعد ما اكلنا قتلة الحمير مابتتحملها ..

وقالنا يالله يامؤمنين اجا دوركم تهجموا وتنتصروا ..

بس ياحسرتي ماضل فينا حيل وفرطنا وما بقا نقدر نوقف على رجلينا لا وغير هيك قعدنا نحنا معشر المؤمنين وبلشنا البكي ولعنّا الساعة اللي قررنا ندخل فيها عالم الفن ..وهيك خلصت معركة بدر بانتصار ساحق للمشركين و هزيمة نكراء للمؤمنين ..

وحرّمت من وقتها اني آخد دور واحد مؤمن … وهيك

See Translation