Ogarite: How much I miss you Adonis.
Posted on: September 3, 2025
A poem of Ogarite Dandash to late Adonis Nasr who was killed covering the war in Syria around 2017.
بتعرف قديش مشتاقة؟
قد ما هالسنة كانت باردة من دونك …
بس شوف صورتك باي مكان بقنع حالي
انك هونيك بغير مدينة او بغير بلد
انه الشغل بعّدك
والقضية اخدتك ومش فاضي
بقنع حالي انه الموت مهما كان غدار ومؤذي. ووقح
مش رح يتجرأ يسرق هالقد فرح ودفء وحب
مشتاقتلك كتير
وعم اشتقلك كتير
طلعت فيروز كذابة
الخيالة ما بيرجعوا …والوقت ما بيقتل الحب
بحسد يلي بيملكوا نعمة النسيان
عالقليلة بيقدروا يطّلعوا لورا ويبرموا وجهم
انا وكتير من رفقاتك بعدنا هونيك قبل تاريخ 19/2/2016
ليش ما سمعت اصواتنا نحن وعم نصرخلك حتى ما تتركنا
يمكن بيواسيني انك فليت انت وعم تعمل قناعاتك
بس هون في كتير اشيا بعدها ناطرتك
في كتير اشخاص بعد بحاجتك
بقولوا الجرح مع الوقت بطيب
الا جرحك كل يوم بينحط فيه اصبع وبيوسعوا
لو فيك ترجع شي يوم وتشوف
نحن ما نسيناك
بروح عالحمرا بتذكرك
بفتح كتاب بلاقيك جواته عم تزركليه انك قريته قبلي
كل اكلة طيبة بترجعني لقرارات الريجيم العقيمة
كل خبر عن نسور الزوبعة بعده بيحمل توقيعك
صوتك ..ضحكتك ..لدغتك .. مسباتك ..رسائلك
تعى خدن معك
ما فيك تتركنا معن لوحدنا
ما فيك تتجاهل كل رجائنا وتوسلاتنا الك تترجع وتبرم ضهرك وتروح
بكرهك
هيدا شعوري اليوم
بكرهك لانك خذلتنا
انت وعدتني بس هالمرة ما وفيت
وعدتني ترجع ونلتقي
ناطرة وصرلي سنة وما رح مل
بعدني ورح ضل قول انك هونيك بشي مدينة ورح ترجع
اذا مش اليوم بكرا بعد سنة بعد مية سنة
Adonis Diaries 
Leave a comment